من ناحية القيادة، أول شيء لاحظته هو وضعية الجلوس. مع إنها سيارة SUV صغيرة الحجم، لكن تعطيك إحساس فعلي إنك تسوق SUV، مش مثل بعض السيارات الصغيرة اللي تحسّها لا هي سيدان ولا هي SUV. الوضعية مرتفعة ومريحة، وهالشيء بالنسبة لي مهم. الديزاين الداخلي والقيادة فيها مريحة وسلسة، الدركسون حجمه مناسب جداً، ويوزن نفسه حسب السرعة. في المدينة خفيف، وفي الخط يصير أثقل شوي ويعطيك ثقة أكبر خصوصاً على السرعات العالية. السيارة فيها خيارين للمحرك: الأول 1.5 تنفس طبيعي، والثاني اللي جربته اليوم 1.4 تيربو مع قير 7 سرعات دبل كلتش. صرفية البنزين ممتازة – اللي معي صرفها حوالي 6.2 لتر لكل 100 كم، وهذا يعتبر جيد جداً خصوصاً إذا استخدامك اليومي داخل المدينة. التعليق الأمامي ماكفرسون والخلفي محور ملتوي، وعلى شوارع المدينة حسيت السيارة ناعمة ومريحة. الدعسة (البنزين والفرامل) سلسة ومتزنة، ما تحتاج تتعود أو تتأقلم كثير – كل شيء طبيعي وسهل. في الزحمة أو وقت السير البطيء، السيارة ما فيها تردد أو نتعة، والجير شغال بسلاسة، وهذا شيء كنت متخوف منه قبل ما أجربها، لأن بعض الدبل كلتشات تكون مزعجة، لكن هنا الوضع ممتاز. ولما تكون ماشي على طرق سريعة داخل المدينة، السيارة تشتغل بوضع القيادة الذكي، وتحاول تفهم طريقتك في القيادة وتعدّل نفسها – وإذا كنت مستعجل شوي، عطها زيادة بنزين وتلقاها تستجيب، بس لو تبغى استجابة أسرع، الأفضل تحوّل على "سبورت مود". جربتها على الخط، ولما مرّينا على فواصل الطريق والمطبات الخفيفة، نظام التعليق تعامل معها بشكل ممتاز، ما حسيت بهزّات مزعجة، السيارة ثابتة وراسية. انطباعي العام عنها إنها تميل للطابع الرياضي شوي، لكن في نفس الوقت مريحة. إذا عندك عائلة صغيرة أو تسافر كثير، أو حتى تطلع أماكن مثل الجبال أو المناطق المرتفعة، محرك الـ1.4 تيربو كافي جداً ومناسب. أما إذا استخدامك خفيف، مثلاً مشاوير عمل داخل المدينة، فمحرك 1.5 العادي بيكفيك ويوفر أكثر في البنزين.