أكثر شي عجبني في الجيل الجديد من BMW الفئة الثالثة هو الشكل الخارجي. يمكن النسخة قبل التحديث كان شكلها أفضل شوي، لكن بعد ما رجعوا شكل الشبك الأمامي مثل قبل، الوضع صار أحسن. جنوط "M" الرياضية عطت السيارة لمسة فخمة وشبابية، وأشوفها بصراحة أحلى بكثير من الشكل الجديد للفئة الخامسة، اللي ما دخل مزاجي أبدًا. مع إن الشوارع دايم زحمة، خصوصًا وأنا رايح الدوام أو راجع، لكن أول ما ألاقي فرصة وأدعس، استجابة السيارة خرافية. صحيح الحين كل الكهربا تسارعها سريع، بس إحساس تشغيل محرك البنزين، خصوصًا صوت التشغيل، له رهبة ومتعة الكهربا ما توصلها. قوة السيارة ممتازة، 245 حصان مع قير 8 سرعات، سلاسة في التنقل وتسارع فوري، والقيادة فيها متعة حقيقية، وهاد الشيء اللي دايم يخلي BMW متميزة. الشاشة الوسطية مقبولة، بس بصراحة أفتقد عصا القير التقليدية، كانت تعطي روح للداخلية. الأنوار الداخلية أو الـ"ambient light" ضعيفة شوي مقارنة بسيارات مثل مرسيدس. المساحة الخلفية معقولة، لكن أكيد ما تقارن بـSUV، والـاستهلاك للوقود يعتبر جيد بالنسبة لمحرك 2.0 تيربو. بشكل عام، السيارة ممتعة فى قيادتها، رياضية، وشكلها جميل... وأكيد، اللي يحب البي إم دبليو، يعرف إن متعة السواقة عندهم شيء مختلف تمامًا.