بما إنها أول سيارة نشتريها للعائلة، قررنا نختار سيارة بنزين تناسبنا للمدينة والسفر، وبعد ما جربنا واختبرنا كثير من السيارات – من الكوري والياباني وبعض السيارات الهجينة الصينية – وقع الاختيار على شانجان إيدو 2025 (نسخة الطاقة العالية). بصراحة اللي خلاني أختارها أول شيء هو شكل السيارة تصميمها يعجبني جدًا، واللون جاء على ذوقي تمامًا. ثاني سبب هو المكينة، 1.5 تيربو تكفيني للخطوط ، ومع إنها صغيرة بس تعطي قوة ممتازة في الخط، وفي نفس الوقت صرفيتها في المدينة معقولة وما تحرق مثل الـ2.0. وثالث وأهم سبب هو السعر، أشوفها صفقة ممتازة، طلعت بسيارة شكلها حلو، ومواصفاتها مليانة! ومن ناحية الاستخدام، أنا وزوجتي كلنا سواقين جدد، فوجود كاميرات 360 كان شيء مهم جدًا – ساعدنا وايد في المواقف والطرق الضيقة، فعليًا لو ما كانت موجودة، ما كنا بندخل أماكن كثيرة! بالنسبة للأداء، السيارة قوية جداً، تسارعها ممتاز، ولو دعست شوي تتجاوب مباشرة. المساحة ممتازة، 3 أشخاص ورا مرتاحين، والشنطة تكفي أغراض السفر والأكل لما نرجع من البيت. الأنظمة الذكية مثل الأوامر الصوتية تخليني أتحكم في المكيف أو أشغّل نافي أو حتى أغاني بدون ما أرفع يدي عن السكان. غير كذا، فيها كاميرا تسجّل بشكل دائم، بس تحط ذاكرة صغيرة وهي تمسح وتحدث نفسها، وحتى التصدير سهل جداً. باختصار، سبعين ألف درهم وكسور وطلعت بسيارة تغطي كل احتياجاتي، وتحميني من الحر والمطر. تجربة ممتازة وبقوة أرشّحها لأي شخص يدور سيارة اقتصادية عملية!