بقالي شهر مشترى هوندا سيفيك 2024 مشيت بيها حوالي 1500 كم، وبصراحة مبسوط جدًا. دي أول عربية زيرو أشتريها، وكنت محتار بينها وبين كذا موديل، بس السيفيك شدتني في التصميم والأداء. الموتور قوي ومناسب للاستخدام اليومي، والسواقة ناعمة ومريحة، خصوصًا على الطرق السريعة. جربت أوصل لـ160 كم/س والعربية كانت ثابتة. استهلاك البنزين في المتوسط حوالي 7 لتر/100 كم، وأقل من كده كمان لو مش مشغل تكييف. ركبت شوية حاجات بسيطة زي كماليات من الفئة الرياضية و CarPlay . أكتر حاجة مضايقاني إن مفيش فتحات تكييف ورا، ولا حساسات ركن خلفية، وده غريب جدًا، ومالقتش في السوق حساسات خلفية لوحدها، كله بيجي مع أمامية كمان، وده مأخرني في تركيبها.وكمان الدهان خفيف شوية والحصى بيأثر فيه بسرعة. بس عمومًا، العربية عجبتني جدًا، ومرتاحة في السواقة، وأنصح بيها أي حد لو عيوبها مش فارقة معاه، خاصة لو بيحب الشكل الجديد زيي.