نيسان سنترا كانت أول عربية أجيبها بعد الرخصة، وندمت إني ما جبتهاش مستعملة لأني خبطتها كتير في أول سنة. أدائها ضعيف خصوصًا على الطريق السريع، والعزل مش قوي. استهلاك البنزين حوالي 6.5 لتر، ومش بستخدم ECO عشان ما أضعفش الأداء. بس بصراحة مريحة جدًا، والكراسي فعلاً مميزة.

اشتريت نيسان سنترا 2021 أوتوماتيك من حوالي شهر، بعد ما دورت على عربية مريحة وعملية للعيلة، خصوصًا إن القديمة ما بقتش تنفع. كنت محتار بين كذا موديل زي الكورولا واللاڤيدا، بس السنترا شدتني في الشكل والمساحة. شكلها شيك ومميز، وحسيت إنها الأقرب للي محتاجه. اشتريتها من معرض تعاملهم كان ممتاز، السعر مناسب، وخدت معاها صيانة وضمان وهدايا كتير. بعد الاستلام ظبطت فيها شوية حاجات بسيطة من النت، زي فرش وسبويلر. في السواقة، العربية مريحة جدًا، سواء قدام أو ورا، فعلاً نيسان معروفة بموضوع الراحة ده. الموتور 1.6 مع CVT مناسب جدًا للمشاوير اليومية، ومش محتاج أكتر من كده. الاستهلاك حاليًا 6.1 لتر/100 كم تقريبًا، وأنا ماشي نص مدينة ونص سفر، وده رقم كويس جدًا. العيوب اللي مضايقاني إن مفيش مثبت سرعة، ولسه فيها فرامل رجل مش إلكترونية، بس في المقابل أخدت عربية مريحة، شكلها حلو، واقتصادية، ومناسبة للعيلة. بصراحة راضي عنها، وأنصح بيها لأي حد بيدور على عربية هادية وعملية ومش غالية.