كنت من قبل تكلمت عن الـE300 والـ5 سيريز، وما كنت ناوي أتكلم عن هالـ"الجنّي" الصغير، بس حسّيت إني ظلمته! عندي 4 سيارات، وهذي أصغر وحدة فيهم، شريتها في 2024 وماشية معي للحين 28 ألف كم. سوزوكي سويفت، والله إنها سيارة ممتعة. صغيرة، لكن فيها كاريزما. استخدام يومي؟ تكفي وزيادة، وحتى تعطيك إحساس شوي كأنها كروس أوفر، مريحة في الرأس والرجلين، والكراسي جلد بتطريز أنيق، والداخلية مطابقة للون الخارجي – نظيفة وتفتح النفس. المكينة 1.5 VVT مع قير عادي 5 نمر، ممتعة جداً، خصوصاً لهواة القيادة. السيارة خفيفة وسريعة في الزحام والمناورات، وتصفّها بأي مكان. تكاليفها؟ شبه معدومة، أغير لها زيت 0W20 وتصفية كل 7000 كم بـ260 درهم فقط – وكل شيء أصلي. المكينة يابانية من سوزوكي، حرفياً تحاول تتعطل ما تقدر! استهلاك البنزين يعتمد على دعستك، إذا سقت بهدوء تصرف حدود 5 لتر، وإذا عصبت ما تتعدى 7.5. السلبيات؟ يمكن بس الدركسون شوي ثقيل، والباقي؟ ما شاء الله ما فيه أعطال، لأنها أساساً ما فيها إلكترونيات كثيرة تتعطل. إن شاء الله أشارككم لاحقاً تجربتي مع البيوك أفينير، بس قلت اليوم أعطي هالطيّب حقه.